ნიუ ვიჟენ უნივერსიტეტი ისწრაფვის შექმნას და შეინარჩუნოს ღია სამუშაო და სასწავლო გარემო და განუხრელად იცავს უნივერსიტეტის ფუნდამენტურ ღირებულებებს - თანასწორობას, მიუკერძოებლობასა და მრავალფეროვნებას.

უნივერსიტეტის მიერ მიღებული თითოეული გადაწყვეტილება დაფუძნებულია თანაბარი შესაძლებლობის პრინციპზე. ნვუ თანასწორობისა და მიუკერძოებლობის აქტიური მხარდამჭერია და მიზნად ისახავს საზოგადოებაში პოზიტიური ცვლილებების შეტანას. 

ნვუ იზიარებს პასუხისმგებლობას გააზიაროს მისი პრინციპები და ღირებულებები საზოგადოებაში, აამაღლოს საზოგადოებრივი ცნობიერება მრავალფეროვნებასა და თანასწორობასთან დაკავშირებით. თანასწორი და მიუკერძოებელი, ღია სამუშაო და სასწავლო გარემოს ხელშეწყობისთვის, ასევე საუნივერსიტეტო საზოგადოებაში უნივერსიტეტის ღირებულებების გაზიარებისა და ერთგვაროვანი გაგების უზრუნველსაყოფად, უნივერისტეტმა შეიმუშავა

მრავალფეროვნებისა და თანასწორობის პოლიტიკა და წინამდებარე გენდერული თანასწორობის გეგმა. გენდერული თანასწორობის გეგმა არ ფარავს სექსუალური შევიწროვებისა და გენდერული ძალადობის, სქესის, გენდერული ნიშნის/იდენტობის ნიადაგზე დისკრიმინაციის წინააღმდეგ უნივერსიტეტში არსებულ მექანიზმებს, რადგან აღნიშნულ საკითხებს ფარავს მრავალფეროვნებისა და თანასწორობის პოლიტიკა. 

გენდერული თანასწორობის გეგმა განსაზღვრავს უნივერსიტეტის მიერ დაგეგმილ კონკრეტულ ნაბიჯებს გენდერული თანასწორობის ხელშეწყობისთვის. გეგმა ასევე მოიცავს გაზომვად ინდიკატორებს, აქტივობების შესრულებისთვის განსაზღვრულ დროით ჩარჩოს და შესაბამის პასუხისმგებელ პირებს/ერთეულებს.

ნვუ, გეგმის შემუშავებისას, ხელმძღვანელობდა როგორც საქართველოს, ასევე ევროკავშირის ნორმებითა და დირექტივებით, შესაბამისი საკანონმდებლო აქტებით, ამასთან, ევროპული უნივერსიტეტების გამოცდილებითა და კარგი პრაქტიკით.

განაცხადის/საჩივრის წარდგენა

თუკი საუნივერსიტეტო საზოგადოების ნებისმიერი წევრი, სტუდენტი თუ პერსონალი, თვლის, რომ შეილახა მისი ღირსება, უფლებები, ან უნივერსიტეტის ეთიკური პრინციპები, ან თუ ის გახდა შევიწროების, ან სიძულვილის ენის ადრესატი, შესაძლებელია განაცხადის/საჩივრის წარდგენა.

განმცხადებელთა კონფიდენციალურობა დაცულია; უნივერსიტეტი ქმნის უსაფრთხო გარემოს, სადაც განმცხადებლებს შეუძლიათ ისაუბრონ საკუთარ გამოცდილებაზე შემდგომი ზიანისა და მუქარის შიშისა და ვიქტიმიზაციის გარეშე.

თუ გესაჭიროებათ კონსულტაციები უნივერსიტეტის ეთიკურ პრინციპებსა და ღირებულებებზე, ან დაინტერესებული ხართ დისციპლინური კომისიის საქმიანობით, პროცესებითა და დისციპლინური გადაცდომის რეაგირების მექანიზმებით, ასევე გსურთ განაცხადის/საჩივრის წარდგენა, შეგიძლიათ მიმართოთ დისციპლინური კომისიის წევრებს მათ სამსახურეობრივ ელ-ფოსტაზე, რომელიც ხელმისაწვდომია ნვუ-ს შიდა საკომუნიკაციო სისტემაში. გარე დაინტერესებული პირებისათვის რეაგირება შესაძლებელია ელ-ფოსტაზე info@newvision.ge .