სასკოლო ოლიმპიადა 2022-ის გამარჯვებულების დაჯილდოვება

ნიუ ვიჟენ უნივერსიტეტმა სასკოლო ოლიმპიადა 2022-ის „სიცოცხლის შემსწავლელი მეცნიერებების“ ნომინაციაში გამარჯვებულები დააჯილდოვა. 

საპრიზო ადგილებზე გასულ მოსწავლეებს - არჩილ ჯაფარიძეს (თბილისის კლასიკური გიმნაზია), ცოტნე ქვარცხავასა (სოფიკო ჭიაურელის სახელობის 54-ე სკოლა) და ანა ელიაურს (გორის მე-2 საჯარო სკოლა) უნივერსიტეტის პარტნიორი კომპანია CARL ZEISS-ის ბოლო თაობის მიკროსკოპები გადაეცათ.

კომპანია ZEISS ოპტიკაში მსოფლიოში აღიარებული ლიდერი კომპანიაა. ნიუ ვიჟენ უნივერსიტეტში, 2019 წლიდან ფუნქციონირებს ZEISS-ის მიკროსკოპიის სასწავლო და კვლევითი ლაბორატორია.

სასკოლო ოლიმპიადა 2022 საქართველოს რვა დიდ ქალაქში ოთხი მიმართულებით მიმდინარეობდა. კონკურსში 63 სკოლის 250 მოსწავლემ მიიღო მონაწილეობა, შედეგად, სხვადასხვა ნომინაციაში 27 გამარჯვებული გამოვლინდა.

ნიუ ვიჟენ უნივერსიტეტი ახალგაზრდა თაობის განათლების, განვითარების და სასწავლო პროცესის ხელშეწყობის მიზნით, სასკოლო ოლიმპიადას 2023 წელსაც გამოაცხადებს.