3.3.1 მოთხოვნის წარმოშობა

“წარმოშობა” მოთხოვნის შემოწმების პირველი ეტაპია, რომლის დროსაც დგინდება მოთხოვნის წარმოშობის წინაპირობებისა და მისი წარმოშობის დამაბრკოლებელი გარემოებების არსებობა. 

მაგალითად, სახელშეკრულებო მოთხოვნის წარმოშობისათვის აუცილებელია ხელშეკრულების დადების წინაპირობები: ორი ურთიერთმფარავი ნების გამოვლენა და შესაბამისი ხელშეკრულების ტიპისათვის არსებით პირობებზე შეთანხმება (სსკ-ის 327-ე მუხლი). გარდა ამისა, არ უნდა არსებობდეს ნამდვილობის შემაფერხებელი გარემოება, რაც ბათილობის საფუძვლის არარსებობას გულისხმობს (სსკ-ის 54-ე-59-ე მუხლები).