წარმომადგენლობითი საბჭო

1. წარმომადგენლობითი საბჭო:

ა) ამტკიცებს დაწესებულების შინაგანაწესს;

ბ) შეიმუშავებს დაწესებულების სტრუქტურის, სტრუქტურული ერთეულების დებულებების,  დაწესებულების ბიუჯეტის შედგენის წესისა და დაწესებულების ბიუჯეტის პროექტებს და დასამტკიცებლად წარუდგენს აკადემიურ საბჭოს;

გ) შეიმუშავებს დამხმარე და ადმინისტრაციული პერსონალის სამსახურში მიღების წესის, შრომის ანაზღაურების ოდენობისა და პირობების პროექტს და დასამტკიცებლად წარუდგენს აკადემიურ საბჭოს;

დ) ირჩევს კანცლერს და ამტკიცებს კანცლერის წლიურ ანგარიშს;

ე) უფლებამოსილია, კანცლერს ვადამდე შეუწყვიტოს უფლებამოსილება, თუ დადასტურდება მისი ბოროტად გამოყენება;

ვ) შეიმუშავებს ბიუჯეტის პროექტს სკოლების საბჭოების მიერ წარდგენილი სკოლის ბიუჯეტისა და დაწესებულების სტრატეგიული განვითარების საჭიროებების გათვალისწინებით და დასამტკიცებლად წარუდგენს აკადემიურ საბჭოს;

ზ) ახორციელებს დაწესებულების საფინანსო-ეკონომიკურ და ადმინისტრირებასთან დაკავშირებულ სხვა უფლებამოსილებებს.

2. წარმომადგენლობითი საბჭოს სხდომა მოიწვევა თავმჯდომარის ინიციატივით ან წევრების არანაკლებ 1/3-ის მიერ.

3. წარმომადგენლობითი საბჭოს სხდომა უფლებამოსილია, თუ მის საქმიანობაში მონაწილეობს წევრების ნახევარზე მეტი. გადაწყვეტილება მიიღება კონსენსუსით. ხმის მიცემა შესაძლებელია ელექტრონული საშუალებების (მათ შორის ელექტრონული ფოსტის) გამოყენებით ან სხდომამდე შედგენილ წერილობით დოკუმენტზე ხელმოწერით. კვორუმის არარსებობის ან გადაწყვეტილების კონსენსუსით მიღების შეუძლებლობის შემთხვევაში, ინიშნება ახალი სხდომა, რომელიც უფლებამოსილია დამსწრეთა რაოდენობის მიუხედავად და რომელზეც გადაწყვეტილება მიიღება ხმათა უმრავლესობით. კანცლერის უფლებამოსილების ვადამდე შეწყვეტისა და ბიუჯეტის პროექტის აკადემიური საბჭოსთვის წარდგენის გადაწყვეტილებები საჭიროებს ხმათა 2/3-ს.