პარტნიორი უნივერსიტეტები

ბრიუსელის დიპლომატიისა და პროტოკოლის საერთაშორისო სკოლა

ბრიუსელში, დიპლომატიისა და პროტოკოლის საერთაშორისო სკოლასა და ნიუ ვიჟენ უნივერსიტეტს შორის ურთიერთთანამშრომლობის მემორანდუმი, 2015 წლის 2 ივნისს, გაფორმდა. საზეიმო ღონისძიებას ევროკავშირში საქართველოს წარმომადგენლობამ უმასპინძლა, სადაც მემორანდუმს ხელი ნიუ ვიჟენ უნივერსიტეტის აკადემიური საბჭოს თავმჯდომარემ, დავით კერესელიძემ და დიპლომატიისა და პოლიტიკის საერთაშორისო სკოლის დამფუძნებელმა, ინეს პირესმა მოაწერეს. ღონისძიებას ასევე ესწრებოდნენ ევროკომისიის, ევროპის პარლამენტისა და აკრედიტებული დიპლომატიური მისიების წარმომადგენლები, აგრეთვე კვლევითი ცენტრებისა და მედიის წარმომადგენლები (Wall Street Journal, Europlitics). მემორანდუმის მიზანია ნიუ ვიჟენ უნივერსიტეტის პოლიტიკისა და დიპლომატიის სკოლასა და ბრიუსელის სკოლას შორის გრძელვადიანი თანამშრომლობის ჩამოყალიბება, გაცვლითი პროგრამების და ერთობლივი ღონისძიებების განხორციელება, ახალი სასწავლო პროგრამების შემუშავება, სტუდენტებისა და აკადემიური პერსონალის კვლევითი საქმიანობისა და პრაქტიკული უნარების დახვეწის ხელშეწყობა. თანამშრომლობის ფარგლებში, 2015 წლის ივნისში განხორციელდა ღია საზაფხულო კურსი თემაზე "გზა პოლიტიკისაკენ: ლობირება და გადაწყვეტილების მიღება", რომელშიც მონაწილეობდნენ ნიუ ვიჟენ უნივერსიტეტის სტუდენტები და პოლიტიკით დაინტერესებული სხვა ახალგაზრდები.

 

აკაკი წერეთლის სახელმწიფო უნივერსიტეტი

უმაღლესი საგანმანათლებლო დაწესებულებების რეგიონალური თანამშრომლობის გაღრმავების ინტერესიდან გამომდინარე, ნიუ ვიჟენ უნივერსიტეტსა და აკაკი წერეთლის სახელმწიფო უნივერსიტეტს შორის ჩამოყალიბებულია შედეგებზე ორიენტირებული პარტნიორული ურთიერთობა. უნივერსიტეტებს შორის უკვე გაფორმებულია ურთიერთთანამშრომლობის მემორანდუმი და ხელშეკრულება საგანმანათლებლო პროგრამების ერთობლივად განხორციელების შესახებ, რაც მხარეების ძალისხმევის გაერთიანების საფუძველზე, რეგიონალურ დონეზე მაღალი ხარისხის უმაღლესი განათლების შეთავაზებას, საგანმანათლებლო პროგრამების ეტაპობრივ დაახლოებას, ახალი ერთობლივი საგანმანათლებლო პროგრამების შემუშავებასა და ხარისხის სრულყოფის ერთობლივი მექანიზმების განვითარებას გულისხმობს. ამ ხელშეკრულებით გათვალისწინებული თანამშრომლობის კონცეფციიდან გამომდინარე ნიუ ვიჟენ უნივერსიტეტის წარმომადგენლები ფონდ „ღია საზოგადოება - საქართველოსა“ და ფონდ „განათლების საერთაშორისო ცენტრის“ ერთობლივი პროექტის ფარგლებში მონაწილეობდნენ 2014 წლის 21 ნოემბერს აკაკი წერეთლის სახელმწიფო უნივერსიტეტში (ქ. ქუთაისი) უმაღლესი განათლების საკითხებზე გამართულ ღონისძიებაში.

 

დავით ტვილდიანის სახელობის სამედიცინო უნივერსიტეტი 

ნიუ ვიჟენ უნივერსიტეტსა და დავით ტვილდიანის სახელობის სამედიცინო უნივერსიტეტს შორის თანამშრომლობის მემორანდუმი, 2016 წლის 21 მარტს, გაფორმდა. უნივერსიტეტები მიზნად ისახავენ თანამშრომლობას კვლევების განხორციელების, პერსონალის გაცვლის, ერთობლივი პროგრამების შემუშავების, ინოვაციური საგანმანათლებლო ტექნოლოგიების დანერგვისა და მრავალი სხვა მიმართულებით. თანამშრომლობის ფარგლებში პირველი ერთობლივი ღონისძიება 2016 წლის 21 მარტს, სასტუმრო კოპალაში გაიმართა, რომელიც საქართველოში სამედიცინო განათლებაში პრობლემაზე დაფუძნებული სწავლების განვითარებას მიეძღვნა. სამუშაო შეხვედრაში საქართველოში აკრედიტებული სხვა უმაღლესი სასწავლებლების მედიცინის სკოლების წარმომადგენლებიც მონაწილეობდნენ.​​​​​​

 

პოლონეთის სოციალურ მეცნიერებათა უნივერსიტეტი

ნიუ ვიჟენ უნივერსიტეტსა და პოლონეთის სოციალურ მეცნიერებათა უნივერსიტეტს შორის ურთიერთთანამშრომლობის მემორანდუმი, 2016 წლის 31 მაისს, გაფორმდა. მემორანდუმის მიზანია საგანმანათლებლო, პროფესიულ და ინტერკულტურულ აქტივობებში სტუდენტების, აკადემიური და ადმინისტრაციული პერსონალის ჩართვა. მემორანდუმის ფარგლებში განხორციელდება ერთობლივი საგანმანათლებლო და კვლევითი პროგრამები, ასევე, დისტანციური სწავლების კურსები და საერთაშორისო კონფერენციები. გარდა ამისა, დაინერგება და განვითარდება სამართლის სფეროში აკადემიური პროგრამების შეფასებისა და სერტიფიცირების საერთაშორისო მექანიზმი.

 

კიევის ეროვნული ეკონომიკური უნივერსიტეტი

ნიუ ვიჟენ უნივერსიტეტსა და ვადიმ გეტმანის სახელობის კიევის ეროვნულ ეკონომიკურ უნივერსიტეტს შორის, 2016 წლის 22 დეკემბერს, ურთიერთთანამშრომლობის მემორანდუმი გაფორმდა. მემორანდუმი ითვალისწინებს გაცვლით პროგრამებს სტუდენტებისა და აკადემიური პერსონალისთვის, ერთობლივი საგანმანათლებლო პროექტებისა და სამეცნიერო კვლევების განხორციელებას. მხარეები განსაკუთრებულ ყურადღებას გაამახვილებენ თანამშრომლობაზე ევროკავშირის სხვადასხვა პროგრამის ფარგლებში და ხელს შეუწყობენ ევროპულ სტრუქტურებში უკრაინისა და საქართველოს შემდგომ ინტეგრაციას.